जावतौ रैयो बंजरपणौ-संदीप पारीक ‘निर्भय’

जावतौ रैयो बंजरपणौ-संदीप पारीक ‘निर्भय’

जावतौ रैयो बंजरपणौ

किरसै रै पसैव री
नान्हीं-नान्हीं छांट
हँसती-पड़ती
लुळ-लुळ लूमती हिंडै ई
बाजरी रै सिट्टां।

अर म्हूं
खेत रै अदबिचाळै
खेजड़ी तळै
सांभळ्यां
कागद अर कलम।

चाणचकां
किरसै री हिमायती
नान्हीं छांटां
छुड़ावती सिट्टां सूं हाथ
आय’र बैठी
ओळ्यां रै मिस
म्हारै कागद पर।

खेत ज्यूं-
हरियल हुय उठ्यौ
सूखौ कागद
महकी सबदां री फसलां
अर जावतौ रैयो बंजरपणौ।

 

संदीप पारीक’निर्भय’
पूनरासर ,बीकानेर

1+

Leave a Reply

Create Account



Log In Your Account