Jogi Bhutal 30 Mar 2023 शायरी प्यार-महोब्बत Jagsir Jogi 24575 0 Hindi :: हिंदी

ਹੁਣ ਖ਼ੁਦ ਦੇ ਨਾਲ਼ ਵਿਵਾਦ ਕਰੇ

           ਸ਼ਾਇਰੀ

ਦਿਲ ਮੁੜ ਮੁੜ ਤੈਂਨੂੰ ਯਾਦ ਕਰੇ
ਤੈਨੂੰ ਦੇਖਣ ਲਈ ਫਰਿਆਦ ਕਰੇ
ਹੁਣ ਖ਼ੁਦ ਦੇ ਨਾਲ਼ ਵਿਵਾਦ ਕਰੇ
ਗੱਲ-ਬਾਤ ਹੋਈ ਐ ਨਵੀਂ ਨਵੀਂ

ਚਾਵਾਂ ਦੀਆਂ ਕਲੀਆਂ ਖਿੜ ਗਈਆਂ
ਸੀਨੇ ਇਸ਼ਕ ਤਰੰਗਾਂ ਛਿੜ ਗਈਆਂ
ਨਜ਼ਰਾਂ ਨਾਲ਼ ਨਜ਼ਰਾਂ ਭਿੜ ਗਈਆਂ
ਚਾਹਤ ਹੋਈ ਐ ਨਵੀਂ ਨਵੀਂ

ਤੈਨੂੰ ਦਿਲ ਤੋਂ ਸਜਦਾ ਕੀਤਾ ਨੀ
ਪੈ ਗਈਆਂ ਪਾਕ ਪ੍ਰੀਤਾਂ ਨੀ
ਮੁੱਕ ਗਏ ਫਾਸਲੇ ਵਿੱਥਾ ਨੀ
ਮੁਲਾਕਾਤ ਹੋਈ ਐ ਨਵੀਂ ਨਵੀਂ

ਲੋਅ ਤਾਰਿਆਂ ਦੀ ਹੋ ਅਸਤ ਰਹੀ
ਹੱਸ ਕੁਦਰਤ ਦੀ ਹਰ ਵਸਤ ਰਹੀ
ਫੁੱਲਾਂ ਤੇ ਸ਼ਬਨਮ ਮਸਤ ਰਹੀ
ਪ੍ਰਭਾਤ ਹੋਈ ਐ ਨਵੀਂ ਨਵੀਂ

ਮੁਦਤਾਂ ਤੋਂ ਪਏ ਉਦਾਸਿਆਂ ਤੇ
ਮਾਰੁਥਲ ਜੇ ਵਰਗੇ ਹਾਸਿਆਂ ਤੇ
ਸਾਰੰਗ ਦੇ ਵਾਂਗ ਪਿਆਸਿਆਂ ਤੇ
ਬਰਸਾਤ ਹੋਈ ਐ ਨਵੀਂ ਨਵੀਂ

ਆਇਆ ਵਿਹੜੇ ਕੋਈ ਫ਼ਕੀਰ ਕੁੜੇ
ਮੇਰੀ ਜਾਗ ਗਈ ਤਕਦੀਰ ਕੁੜੇ
ਜਦ ਹੱਸਿਆ ਜੋਗੀ ਪੀਰ ਕੁੜੇ
ਕਰਾਮਾਤ ਹੋਈ ਐ ਨਵੀਂ ਨਵੀਂ

ਰਿਹਾ ਭਟਕ ਧਿਆਨ ਨਾ ਟਿਕਦਾ ਏ
ਤੇਰਾ ਅੱਖਰਾਂ ਚੋਂ ਮੁੱਖ ਦਿਸਦਾ ਏ
ਹਾਲੇ ਜੋਗੀ ਲਿਖਣਾ ਸਿੱਖਦਾ ਏ
ਸ਼ੁਰੂਆਤ ਹੋਈ ਐ ਨਵੀਂ ਨਵੀਂ

                 ਜਗਸੀਰ ਜੋਗੀ ਭੁਟਾਲ