अर्थी अरमानां की-दीप जांगड़ा

अर्थी अरमानां की-दीप जांगड़ा

आज सांझ के सीलै मनै एक अर्थी जाती देखी हैं
छोटी छोटी दो आस आंख तै ख़ून बहाती देखी है

आज जो भी हर्फ़ सुणै थीं उन मैं दर्द भरया पड़या था
तड़कै स्कूल मैं हँसदे नै छोड़ कै गई थी इब अर्थी पै पड़या था
दूर तै देखते ही बालकां का भीतर पाट पाट आवै था
जब बेरा पाटया यू अर्थी पै उनका बाबू जावै था
बिलख बिलख कै मुरदे पर तै कफ़न हटाती देखी है
छोटी छोटी दो आस आंख तै ख़ून बहाती देखी है

टूट गी वा आस आज एक बसता संसार लूट गी
गिणती के सांस होवैं पर आज डोर अधर मैं छूट गी
कोई मरया कोई जिया किसनै संभाल करी है
एक बाप मरया एक माँ हारी दो किस्मत मरी हैं
भागां आली कच्ची रेखा आज रंग उड़ाती देखी है
छोटी छोटी दो आस आंख तै ख़ून बहाती देखी है

काच्ची काटो या खेल खिला कै ऊपर आले की खेती है
ऊपर आले नै कद सोची तेरी कच्ची फ़सल की बेटी है
वो उनका भाग ख़ुद आप लिखै है हम अंदाजा लावां हाँ
अपणे भाग का खावैंगी हम दुनिया नै रोज़ बतावां हाँ
नही फ़िकर किसे नै पड़ी भूख मैं हाथ फैलाती देखी है
छोटी छोटी दो आस आंख तै ख़ून बहाती देखी है

घणे ग़लत अंदाजे ला दें हैं हम बस फ़र्क नीयत का होवै लोगो
पाटे लतयां मैं फिरै माँगती दर असल वा रिश्ते टोहवै लोगो
जिसा मन मानै उसी मदद करो क्यूँ बेखाम मैं ख़ून जलावां सां
उसकै सिर पै वो साया ना सै हम जिस करकै गिरकावां सां
चोर लुटेरी दुश्मन डाककण के दोष उठाती देखी है
छोटी छोटी दो आस आंख तै ख़ून बहाती देखी है

किते मर्म दिखया किते ज़श्न बणै किते आँशु सैं किते खुशी घणी
कोई बसण लागरया कोई उजड़ गया या एक जगाह पै किसी बणी
कोई राम कै तोहमद लावै सै किते होरया सै गुणगान राम का
ख़ुशी ग़मी तै सांझी थी रै किसा बदल गया यू महौल गाम का
सिर पटक पटक कै बीच सड़क आज होश गवाती देखी है
छोटी छोटी दो आस आंख तै ख़ून बहाती देखी है

दुःख देख बराबर एक नज़र तै तेरा मेरा न्यारा कोन्या
कोई दूर सड़क पै दिखै अगर बस सोच लिए सहारा कोन्या
मरणा सीख मरी मैं आकै “दीप” जमाना बैरी कोन्या
दुःख बिराणा देख मुडै जो उस्तै बढ़ कोई जहरी कोन्या
भीड़ पड़ी मैं दुनिया लोगो आंख चुराती देखी है
छोटी छोटी दो आस आंख तै ख़ून बहाती देखी है

आज सांझ के सीलै मनै एक अर्थी जाती देखी हैं
छोटी छोटी दो आस आंख तै ख़ून बहाती देखी है

 

 

दीप जांगड़ा

 

 

 

 

 

Deep Jangra

मैं दीप जांगरा कैथल हरियाणा का निवासी हुँ। मैं वीर रस का कवि हूँ।

Visit My Website
View All Articles

I agree to Privacy Policy of Sahity Live & Request to add my profile on Sahity Live.

0

Leave a Reply

Create Account



Log In Your Account