Anilkumar Rathwa (Sameer) 11 Apr 2026 ग़ज़ल समाजिक ચતુર્થ વાનર: એક વિષાદ 2458 0 Gujarati :: ગુજરાતી

ત્રણ હતા તે તત્ત્વદર્શી, મૌનનો મહિમા હતા,
ચોથો આવ્યો તે જગતનો, કેવો આ વિપર્યાસ થયો?

​નયન મીંચીને બેઠા'તા તે, અશુભ નજરે ના ધરે,
આ તો લોચન ખુલ્લા રાખી, અંધાપો વહોરી રહ્યો.

​શ્રવણદ્વારે બાધ રાખ્યો'તો, અસત્ય ના સાંભળવા,
આ તો ઘોંઘાટની ભીડમાં, મૌનને પણ ખોઈ રહ્યો.

​વાણીમાં સંયમ ધરીને, સત્યના જે પથ પર હતા,
આ તો આંગળીના ટેરવે, શબ્દોનું મૂલ્ય ધોઈ રહ્યો.

​નથી કોઈની સ્મૃતિમાં, નથી કોઈના સાથમાં,
કાચના એક ટુકડામાં, આખો જન્મારો રોઈ રહ્યો.

​હતો માનવ મનનશીલ, હતો સંબંધોનો ધણી,
આજે અચેતન યંત્રના, પાશમાં એ ખોવાઈ રહ્યો.