Anilkumar Rathwa (Sameer) 09 Oct 2026 ग़ज़ल समाजिक #google#bing#chhotaudepur#instagram 3920 0 Hindi :: हिंदी

સત્યના હોઠો ઉપર તાળું અહીં દેખાય છે,
જૂઠના દરબારમાં કેવો દીવો પ્રગટાય છે!

​બોલનારા સત્યને ઊભા રખાયા પાંજરામાં,
સાક્ષી જૂઠા જે હતા, એનો જ યશ ગવાય છે.

​જેમના વેચાઈ બેઠા છે વિચારો ક્યારના,
એમના મુખથી જ ક્રાંતિનો ધ્વનિ રેલાય છે.

​પાત્રતા ઊભી રહે છે દ્વાર પર લાચાર થઈ,
ઓળખાણોના સહારે તખ્ત પણ સોંપાય છે.

​આપતા’તા જે કદી સિદ્ધાંતનાં ભાષણ બધે,
આજ સત્તા પામવા એ ખુદ અહીં વેચાય છે.

​પ્રશ્ન જે પૂછે, ગુનેગાર એ ગણાયો આંખમાં,
આંધળા ચાલે વળી એ જ્ઞાનીમાં ખપાય છે.

​સ્વાર્થ પૂરો થાય તો સંબંધ પણ વિસરાય છે,
માનવીનું મૂલ્ય ક્યાં? ઉપયોગિતા મપાય છે!

​સાંભળે ના જે કદી અંતરતણો પાવન અવાજ,
એ જ બીજાના ચરિત્ર ઉપર હવે તોળાય છે.

​શબ્દના શંખ ફૂંકીને શું કરું હું ઓ ‘સમીર’?
ચેતના સૂતી રહે તો અર્થ ક્યાં સચવાય છે!

​જાગશે જ્યારે જનો, ત્યારે ઉતરશે આ નકાબ,
નહિ તો ઇતિહાસમાં પસ્તાવો જ નોંધાય છે.